عن البرباطوظ

في نوفمبر ٢٠١١ ظهر هذا الشخص المريب في فضاء الانترنت تحت اسم… برباطوظ.
ابتدا شريف عادل مشواره في فن الكوميكس في اليوم ده وقرر إنه يخش المجال من غير ما يكون عارف هيعمل إيه بالظبط، المهم هو كان عنده وصلة إنترنت وأقلام حبر وورق.
فتح بلوج على تمبلر وأكاونت على تويتر وبدأ يرسم كوميكس وينشرها، تدريجياً ابتدا يتعلم ويتكون عنده جمهور. ابتدا تدريجياً يحسن مستوى شغله من خلال التعليقات والانتقادات اللي بتجيله وبرضه من خلال فنانين الكوميكس اللي اتعرف عليهم من خلال وجوده في المجال.
شارك في كذا مسابقة واتعرض شغله في كذا معرض ومستواه وصل لمرحلة كويسة وجه وجهه لمحاولة تحقيق حلمه في كتابة ورسم قصص مصورة مسلسلة من دماغه ونشرها. نزل أول عدد من مجلة الخيال العلمي الكوميدي في نوفمبر ٢٠١١ ولاقت نجاح كبير ورد فعل إيجابي من القراء.
دلوقتي البرباطوظ بيتحول لموقع جماعي يضم فنانين مصريين مبدعين بيتعاونوا لتقديم كوميكس وقصص مصورة من أنواع ومجالات مختلفة بيجمعهم حلم واحد هو خلق مؤسسة ناجحة لصناعة فن الكوميكس في مصر والعالم العربي.